يابخت من لاعه من الوقت لوعات=من بعدها يعرف صديقه من اعداه
أثر المصايب بيّـنت كلّ غايات=وابدت خوافي كلّ خاطر من اقصاه
بعض العرب ماشفتهم في المهمّات=ماكلّ من دوّرت في العسر تلقاه
أضحك واكابر واكثر الغبن مامات=حتى المنام استثقله مااتهنـّاه
من جفوة اصحاب ٍ جزوني بصدّات= من بعد ماكنـّا سوا بالمخاواه
أخوّة الصادق مع اهل الخيانات=يخسر بها نفسه ويفقد مزاياه
الله يعوّضني على كلّ مافات=والله يجازيني على الصبر برضاه
هذا وانا جرّبت ظلم الصداقات=ظلم ٍ من اسبابه عرفت المعاناه
الليل طال ونظرتي للسماوات=أحلم وعيني ماادركت مااتمنـّاه
أحَبّ واجمل وقت والـذ ّ ساعات= ليلة يطيح الهمّ والقلب ينساه
الليل سلوه في زمان المتاهات=يجلي به الخاطر همومٍ تعلاه
في القلب شيّ ٍ ماتوصفه الابيات=ماجاه من دنيا البليّات كفـّاه
لكن بعض القول يجلي ملمّات=ترتاح به روح ٍ تحبّه وتهواه