هذه القصيده اخر انتاج علي السبيه الغلبان وهي
قابله للنقد من كل من يمر عليها هذا اذا حد مرعليها


قصة العاشق

قرينا قصة العاشق مع اللي حسنها معروف
شبيه البدر الى غطا نجوم الليل في مبداه

وانا ماني من اهل العشق عنهم خاطري مصروف
ولا صدّقت هايم من جنونه قال يا ويلاه

ترا اهل الحب حيّاله وتلقا من حيلها اصنوف
كذوبه دمعة التمساح الى هلّت بها عيناه

وتترغّب وتتمنّع وهي تلعب على المكشوف
ومن لا طاعهم في غيهم بين البشر تنساه

جحود وصد دنياهم ولا فيهم ولا معروف
وتتشابه طبايعهم وكلن صاحبه شرواه

يشبون القلوب الخضر حتى تحترق باالجوف
وكلن يغدر الثاني على اسم الحب ياعيباه

وراعي الحب تسرح به شياطين الهوى وتطوف
وتلقا دفتره مفتوح وكلن (م)البشر يقراه

ويصبح يطرد اوهامه والى امسا يعتريه الخوف
ويملي قلبه الفارغ ضنون وكذب من دنياه

ويمشي سكته تايه كما الحلبوب ماله شوف
ويقصر به طريقه لو مشا به عمر ماوداه

وعود الحنضله ماضن تلقا به ثمر مقطوف
وهي غرسه رديه عودها مايرتجا مجناه

كذالك كل منهو قال قلبي عاشقً ملهوف
وفي قلبه دمه بارد برود الثلج في قطباه

تعرّا من ثياب الستر وفي ثوب الدنس ملفوف
يدنَس كل من طاعه وفي درب الدنس جارها

قلوب(ن)يضرب الشيطان فيها دفه المعزوف
وتطرب له وترقص له وتتغّنا معه بغناه

وكلن تايهن قلبه وعلى نقض العهد مألوف
تراهم يدّعون الحب ولا يدرون وش معناه