أكاديمـيـة العرضـة الجنوبيــة - ربـاع - القصة الصديق (( الرفيق الوفي )) كويتي وسعودي

بسم الله الرحمن الرحيم
السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين

هذي قصه حصلت أيام الأزمة واعتداء صدام على الكويت

والقصة عجيبة وأقرب إلى المغامرة بالروح والمال من اجل صديق قديم

وأبطال القصة لا زالوا موجودين وأحياء وهم في منتصف العمر أيام الأزمة وسمعت قصتهم وتعجبت منها .
وأبطال القصة سعودي وكويتي السعودي والكويتي من قبيلتين مختلفتين وأسمائهم معروفه . وقصها لي احد الناس الذي يعرفون السعودي وقد قصها على رفيقنا بحذافيرها .

اليكم القصة

كان السعودي قبل الأزمة بسنين يهرب السلاح قبل منع تجارة الأسلحة وكان يذهب لشرائه من العراق وتعرف على احد المواطنين الكويتيين الذي كان أيضا يتاجر بالسلاح .

المهم صار في كل رحلة لشراء السلاح يقلط السعودي على الكويتي أثناء ذهابه وأثناء رجعته .

وكان الكويتي متزوج من مره واحده وصارت تعرف السعودي وصار يقلط في البيت أثناء غياب زوجها حتى يأتي
تقلطه في الملحق وتخلي بناتها الصغار يجيبن له القهوة والشاهي لين يجي زوجها .

قرر السعودي ترك تجارة السلاح وحط أرقامه عند الكويتي وقال إن احتجتني تلقاني . وكانت تلك آخر مقابله لهم .

مرت السنين وحصل العدوان الغاشم على الكويت

وصادف وقوع العدوان الغاشم أن الكويتي كان في السعودية وفي البر في نجد ولا كان فيه اتصالات وكان الكويتي معه أكبر عياله وذهب من البر في جنوب نجد إلى الرياض ووصل الرياض حول العصر ولا يعرف احد في الرياض وتذكر بالصدفة رفيقه السعودي القديم اللي كان ساكنٍ قريباً من الدار البيضاء والحواري هذيك .

ودور رقمه ولقاه معه في ورقه قديمه أكل الزمان عليها وشرب في بوكه وقال أبي أروح له كوده يفزع لي بسلاح أروح أجيب أهلي قبل يصيبهم شيء

طبعاً كان الكويتي أيام الأزمة متزوج زوجه ثانيه وساكنين في بيت واحد مع زوجته الأولى وأكثر عياله بنات كبار وأولاد صغار وجنت جنونه خايف يلحق عرضه شيء

المهم اتصل على السعودي ولقاه مؤجر بيته وسأل المستأجر عن بيته الثاني ودله عليه وكان قريب من بيته الأول

وآخذ الوصف من المستأجر وراح لرفيقه السعودي ولقاه في البيت عنده عياله وسلم عليه وعرفه رفيقه . المهم أخذت الكويتي العبرة وبكى وارتاع السعودي وانشده عن السالفة وعلمه بالقصة .

وطمنه السعودي وقال الأمور زينه وخلنا نتصل عليهم الحين وأنا علي الطلاق ما تروح لين تتعشى الليلة وعقب ما تتعشى ابشر باللي تبي وأنا معك على ما تبي

ما لقي الكويتي مفر من الموافقة على طلب السعودي ولا سيما انه مرهق له يوم كامل

مواصل

أما عن السعودي فقد كانت هذه حيلة منه لإقناع الكويتي بالجلوس والا اللي كان في رأسه تخطيط ثاني .

المهم راح السعودي لحرمته وقال أعطيني الرشاشرشاش وأعطيني ذخيرة وأعطيني ثلاثين ألف ريال .

ونادى ولده الكبير وقال روح سو الذبايح وإذا سأل عني قل ما ادري عن أبوي وين راح وان شفته بيمشي مهما تأخرت هبط عزمه . وقل له تبي تمشي وحنا ما ندري وين أبونا فيه وأقلقوه علي وأحرجوه يجلس غصب عشان يستحي يترككم وقولوا له أبونا راح يجيب أغراض لك من السوق عشان تروح لأهلك وحنا خايفين عليه لا يكون صار له حادث وإلا شيء

المهم الكلام هذا كان المغرب .

السعودي ركب جيبه وقرر المغامرة والذهاب إلى الكويت وتعدي الحدود كلها من اجل أن يأتي بحريم الكويتي وبناته وعياله الصغار وقال إن مت مت في رد معروف رفيقي وان حييت سلمت من الملامة ورديت له شيء من وفاته لي

في السنين الماضيه

وصل السعودي الحدود السعودية وكانت الأوضاع بين السعودية والعراق لا زالت لا بأس بها يعني قبل تشتب بين السعوديين والعراقيين إذا انتم تذكرون .

وكان هناك منعاً باتاً بأن لا يسمح لأي سيارة خاصة في دخول الكويت خوفاً عليها من الجنود العراقيين .

ورفضوا يسمحون له بالدخول وقام يمثل عليهم البكاء وان عائلته في خطر وانه كويتي الجنسية من أصل سعودي لكن ما معه إثبات ورفضوا.
أشفق عليه أحـد من الجنود السعوديين وناداه على طرف وقال أنا أبي أساعدك لكن اسمع .

حنا عندنا آمر نخلي الشاحنات يمرن وإذا رفعت البوابة للشاحنة تعال من جنبها وازرق ولا تلتفت ترى ما احد طاردك والكل ذال على نفسه وجنود الحد العراقيين ما بيننا وبينهم أي علاقة أو أي ارتباط.

المهم نفذ الخطة ونجحت ويوم وصل حدود الكويت اللي يسيطر عليها العراقيين رفضوا يدخلونه لين رشاهم بكم ريال سعودي . وخلوه يدخل

المهم دخل الكويت وهو ذال وساعده على التحرك بحرية انه سعودي وما بعد صار بين السعوديين والعراقيين شيء ولا بعد تأزمت الأوضاع بينهم .

المهم راح عند كبينه ما ادري بقاله وكلم بيت الكويتي وردت عليه زوجة رفيقه وطمنها وخافت منه وقال أنتي من أنتي .

قالت أنا زوجة الرجال اللي تقول انك جاي من يمه . قال . اجل زوجته فلانة وينها ؟

قالت : وش تبي منها ؟
قال : أقول أعطيني إياها وقولي فلان بن فلان من طرف زوجك يبي يكلمك.
المهم كلمته الزوجة الكبيرة (الأولى) وذكرها بنفسه وعرفته وقعدت تبكي وسألها : صابكم مكروه وإلا لا ؟

قالت حنا بخير والى الحين ما صابنا شيء وبناتنا حاطتهن بالقبو خايفين عليهم من الجنود أما المال فخلهم يأخذون اللي يبونه والى الحين ما أنسرق منا شيء والبيوت اللي حولنا انسرقت كلها .

قال : افتحي قراش السياره لي لأن ما فيه حيل أطق الباب ويشوفوني العراقيين . وخلي البنات والعيال يتجهزون وشيلوا ما خف حمله وغلي ثمنه مثل الذهب والفلوس والأمور الضرورية والقيمة .

دخل البايكه وشالهم كلهم وهم كلهم يتباكون . وكل واحد منهم خايف لا يوقفونه العراقيين .

ويوم اقبل على المركز العراقي من جهة السعودية خاف على البنات منهم وجهز الرشاش رشاش (يعني عباه بالذخيرة) تحسباً لأي شيء وطمعهم بكل الفلوس اللي معه وهي وأعطاهم إياها .

ومن ثم جاء للمركز السعودي ودخلوه لأن اللي جاي يسمحون له بالدخول ولا سيما ان معه عائلة .

المهم يوم اقبل على الحفر وكان الحريم نايمات صحين وقالن حنا وين ؟

قال: حنا في السعودية . وقامن يبكين من الفرحة . وهو كان له يوم ما رقد وقال لهن نبي نرقد هنا وقامت الزوجة الكبيرة ووصت واحد من عيالها الصغار وخلته يحط له فراش يرقد عليه أما هن ما جاهن النوم .

المهم قام على أشعة النور وقومهن (صحاهن) وقال اركبن نبي نمشي .

أما بالنسبة للكويتي فهو وسوس وصار بين نارين . نار رفيقه اللي راح يبي يجيب أغراض الرحلة ولا يدري هو ميت وإلا حي وبين نار أهله اللي ما جلس إلا يبي يتجهز عشان يجيبهن .

ونجحت خطة السعودي معه في إبقاءه في البيت .

ما قال مؤذن الظهر الله اكبر.

إلا والسعودي في بيته ودخل على رفيقه الكويتي ويقول له ابشر بأهلك والكويتي منذهل ولا هو مصدق

وكان أهل السعودي أيضا خايفين على أبوهم ولا يدرون هو يرجع حي وإلا ميت . ويوم تلاقت عائلة السعودي والكويتي صار البكاء على الغالبة على الجميع حتى أهل السعودي من زود الفرح والنجاة .والمنجي هو الله سبحانه وتعالى .

وقد قال احد الشعراء أبيات في هذه القصة ما أحفظ منها إلا هالبيتين:

بيض الله وجه من جازف على شان الرفيق

يوم بعض الناس ما يغني رفيقٍ شانها

عند دمعة صاحبه عاف الحليلة والصديق

صارع السبع الفيافي والنضار بأرسانها

في ظلام الليل الأسود لا ملاذ ولا طريق

ساق روحه لأجل يرضي صاحبه لأكفانها

وسلامتكم جميعياً