يسعد صباح المواجع والألم والجراح=
ويسعد صباح الطعون اللي تلقيتها
ويسعد صباح الحزن لاشق وجه الصباح=
ويسعد صباح المدامع يوم هليتها
أنا تذوقت طعم الحب فوق الرماح=
وأنته رسمت الهوى كذبة ومشيتها
أحاول أسير بالمركب بعكس الرياح=
لكن الأقدار تجري عكس ماجيتها
لاصار ذنبي مصيبة وإنت ذنبك مباح=
صارت حياتي معك صعبة ومليتها
تخطي وأعاتبك وأبكي وأرتجيك السماح=
من طيبتي كل زلة منك عديتها
يالجادل اللي ملكني بين كل الملاح=
عز الله إنك طعنت الروح وأنهيتها
فرصة سعيدة تعرف خاطري عالجراح=
وفرصة سعيدة سكنت العين وأبكيتها
كني سكنت القبور اللي غمرها الصياح=
صياح من حيها يبكي على ميتها
وأعيش في معمعة صبر وحروب وكفاح=
وأسرار مستعمرة للحزن مريتها
وفي صومعة خاطري كني عقدت النكاح=
بيني وبين التعاسة والحشا بيتها
ياحظ من هو عن الدنيا رحل واستراح=
دنيا_محطة عراك أموات_ سميتها
كم فرقت من حبايب وأجمعت من قباح=
وكم روس ذاقت خيانتها وتشتيتها
يالله وأنا عبدك اللي زاد همه وطاح=
ياللي رفعت السما والأرض سويتها
تبري جروح بقلبي مثل رمي السلاح=
لو في محاجر عدوي ماتمنيتها
وأنك تمد الفواد بصبر لجل النجاح=
وأقهر حقودين وأرضي ناس حبيتها
وتقود روحي على درب الهدى والصلاح=
وتقر عيني بروح مابعد ريتها