لك حق عندي مثل حق الجار وحقوق الشقيق=ما دام لي عين ٍ يداري جفنها عن موقها
إن ما وصلتك لا تنشد لا عدو ولا صديق = أسبل دموعك واعرف إن الأرض ماني فوقها

أخاف لامن رحت ما ألقى لا صديق ولا رفيق = وتذوب نفسي والدماء تيبس بوسط عروقها
واقعد لوحدي واقف أتلفت وأدور للطريق =وأرقب غروب الشمس وأترقب شعاع شروقها
الله معك دربك سفر يا راعي القلب الرقيق=ذق لوعة الفرقا وأنا من كأسها باذوقها

يا صاحبي والعهد فيما بيننا يبقى وثيق=يشبه لما يربط عتيبه برقها مع روقها
اللي يفارق مثلكم ما ظن للفرقى يطيق =ونفس ٍ تفارق وافي الأصحاب تشكي عوقها
والله ليبقى لك بفكري من سناء فكرك بريق=يضوي بفكري مثل ما تضوي سما ببروقها
انته تمثل في عيوني لا بدى بادي فريق = والقاك لامن بان في وجه الحياه فتوقها
ذا هاجس الذكرى يئجج داخل افكاري حريق = الله يجيرك من ظنى الذكرى ولفح حروقها
انت الصديق انت الرفيق انت الفريق أنت العريق=مشاعرك من طيبها يشهد لها منطوقها
البعد مهما طال عن نفح المشاعر ما يعيق=لاشعارك اللي تعتبر مثل العسل في ذوقها
يا صاحبي والصقر من سجنه غدى حر وطليق=حلق على الصيده وهد وسطوته من فوقها
خله يحلق في سماه ويهجر السجن السحيق=واترك جناحينه ترفرف بالفضاء من شوقها
اللي سبح في بحر ما هو كفو غباته غريق = ما يحتمل في سطوة الامواج وقت صفوقها
يزأر أسد في غابته وغرابها ينعق نعيق= وشاعر يغرد باعذب أبياته وحلو طروقها
وأنا أحمد الله لا ذليل ولا ضعيف ولا شفيق=كسبت وقفات الجمايل والوفاء من سوقها
اللي يحاول ينتقص من حقنا خبره عتيق = والله ليطعم غصة الايام قبل يذوقها