سلام يالرجل الشجيع=سلام من قلب ٍ وسيع
ينصاك يالسيف البريع=قيدوم قيف بني عمر
يقوله اللي مايهاب=سيف ٍ على بعض الرقاب
يعجبك حدّه والنـّصاب=الشاعر احمد بن مطر
وجدي على بعض الرجال=ماله مع ربعه فعال
واذا تحزّم للقتال=جنبيّته مثل الكمر
وبعضهم سيف ٍ سنين=في مغمده والاّ مبين
يحمي يسارك واليمين=بين البوادي والحضر
وبعضهم مثل العصاه=رفيق في وقت الهناه
لكنّ اذا زوّد بلاه=وقت الشدايد ينكسر
وبعضهم مثل الجبل= ماينهدم مهما حصل
كلّن بظلـّه يستظل=مرفوع عن كلّ البشر
وبعضهم مثل النخيل=ماهو بما عنده بخيل
يداوي القلب العليل=من طيب قوله والثمر
وبعضهم عقرب ثرا=غير المساوي مايرا
لو بيده ارزاق البرا=ليمنع الما والمطر
وبعضهم مثلك كفو=يقولها حتى العدو
واقول يالربع اشهدوا=انّ ابن عابد له قدر
هذا نشيدي واقبله=وانظم جوابك وارسله
قول ٍ يسرّك تنقله=بين المشايخ والجبر
ثمّ الصلاة على الرسول=عداد مافي البحر لول
حسب المذاهب والأصول=ختام علمي والخبر